ბათუმის მერიასთან ინვესტორებისგან დაზარალებულმა მოქალაქეებმა მერთან შეხვედრის მოთხოვნით აქცია გამართეს. ისინი ინვესტორებს თაღლითობაში ადანაშაულებენ. მათივე ინფორმაციით, წლების წინ სამშენებლო კომპანიებმა სხვადასხვა ქუჩაზე საცხოვრებელი კორპუსების მშენებლობა დაიწყეს, თუმცა ვალდებულებები არ შეასრულეს და დღემდე მშენებლობა დაუსრულებელია, კომპანიებთან დაკავშირებას კი ვერ ახერხებენ.
მათივე განცხადებით, პროკურატურას რამდენჯერმე მიმართეს, თუმცა უშედეგოდ.
“ბოლო წლების განმავლობაში ერთ – ერთი ყველაზე მტკივნეული და მოუგვარებელი პრობლემის მოგვარების დაპირების შესრულებას მოითხოვს ქალაქის ტერიტორიაზე მცხოვრები სხვადასხვა უბნის მოსახლეობა. მერთან შეხვედრაზე დაზარალებული მოსახლეობა აპირებს გაარკვიოს, თუ რა წილ პასუხისმგებლობას იღებს ხელისუფლება.
ბოლო 15 წლის განმავლობაში ყველა არჩევნების წინ ხელისუფლება ჰპირდებოდა ხალხს პრობლემის მოგვარებაში აქტიურ ჩართულობას , თუმცა პრობლემა მოგვარების ნაცვლად უფრო მეტად მაშტაბური ხდება. საქმე გვაქვს მრავალი ათასი ოჯახის, ხშირ შემთხვევაში, საკუთარი ქონების სხვის სახელზე გადაფორმება , დათმობასთან და საბოლოო ჯამში, მოქალაქეები სახლკაროდ ქუჩაში რჩებიან.
ხშირ შემთხვევაში, მოქალაქეები ე. წ. ინვესტროებისა და ბიზნესმენების თაღლითური, წინასწარ, განზრახ, ასევე, ხელისუფლების გავლენიან მაღალჩინოსნებთან გარიგების მსხვერპლნი, ხდებიან”- აცხადებს უფლებადამცველი თამაზ ბაკურიძე.
მოგვიანებით აქციის მონაწილეებს ქალაქის მერი შეხვდა.
