6 გარდაცვლილი და ხუთი მძიმედ დაჭრილი – უმძიმესი ღამე საგარეჯოს მუნიციპალიტეტში. ტერაქტი გვიან ღამით მოხდა. ყოფილმა სამხედრომ ადამიანები ცეცხლასროლი იარაღით საცხოვრებელი კორპუსიდან გასროლით მოკლა. დაჭრილების მდგომარეობა მძიმეა, ისინი სამედიცინო დაწესებულებაში არიან მოთავსებულები.
დაღუპულებს შორისაა მოქმედი პოლიციელი, რომელიც მოქალაქეს გადაეფარა და სასიკვდილოდ დაიჭრა.
მედიაში გავრცელებული ინფორმაციის თანახმად, ხუთი ადამიანის ლიკვიდაციის შემდეგ, ტერორისტმა სისცოცხლე თვითმკვლელობით დაასრულა.
„გამოძიების ინფორმაციით, საცხოვრებელი კორპუსის ერთ-ერთი ბინის აივნიდან 1974 წელს დაბადებულმა ნ.ა.-მ რამდენიმე გასროლა განახორციელა, რის შედეგადაც გარდაიცვალა ოთხი და დაიჭრა კორპუსის ეზოში მყოფი ხუთი ადამიანი.
ბრალდებულმა პირმა ასევე ცეცხლი გაუხსნა ადგილზე გამოძახებულ შინაგან საქმეთა სამინისტროს თანამშრომლებს, რომელთაგანაც ერთ-ერთი გარდაიცვალა.
შემთხვევის ადგილზე მოხდა პოლიციის დამატებითი ჯგუფების მობილიზება, ასევე ადგილზე გამოძახებულ იქნა შინაგან საქმეთა სამინისტროს სპეცდანიშნულების რაზმი, რომელთა მისვლისთანავე ბრალდებულმა ცეცხლსასროლი იარაღიდან გასროლით, სავარაუდოდ, თვითლიკვიდაცია განახორციელა.
ადგილზე მუშაობას იწყებენ გამნაღმველები და დამატებითი ინფორმაცია მოგვიანებით გავრცელდება.
გამოძიება სისხლის სამართლის კოდექსის 109-ე მუხლის „ლ“ ქვეპუნქტით და 236-ე მუხლის მესამე ნაწილით მიმდინარეობს, რაც დამამძიმებელ გარემოებაში ჩადენილ განზრახ მკვლელობას და ცეცხლსასროლი იარაღისა და საბრძოლო მასალის უკანონო შეძენა-შენახვასა და ტარებას გულისხმობს“, – ნათქვამია შსს-ს განცხადებაში.
