რა ხდებოდა დღეს მთავარი აჭარაში. რაზე წერდნენ ადგილობრივი მედიები – ათი მთავარი ამბავის დაიჯესტი:
- ბათუმის საქალაქო სასამართლომ „ბათუმის ბულვარის“ ყოფილი დირექტორის სარჩელი არ დააკმაყოფილა. მოსამართლე ალექსანდრე გოგუაძეს გადაწყვეტილების გამოცხადების შემდეგ განმარტება არ გაუკეთებია | ინფორმაციას ამის შესახებ “აჭარის ტელევიზია” ავრცელებს.
- ბათუმის საკრებულოს დეპუტატმა, ნინო ცხვარაძემ ,,ქართული ოცნება” დატოვა. იგი ანტიდასავლურ მოძრაობას ,,ხალხის ძალა” შეუერთდა. გადაწყვეტილების შესახებ ცხვარაძემ საკრებულოს სხდომაზე განაცხადა | ინფორმაციას ამის შესახებ “TV25” ავრცელებს.
- ბათუმის ტერიტორიაზე სამარშრუტო მიკროავტობუსების მოძრაობის სქემა იცვლება. ახალი სქემა ქალაქის მერიამ ბათუმის საკრებულოს უკვე წარუდგინა. სამარშრუტო მიკროავტობუსების ახალი სქემა საკრებულოს შესაბამისი დადგენილების ძალაში შესვლის დღიდან ამოქმედდება | ამის შესახებ “ბათუმელები” იტყობინება.
- ბათუმის საკრებულომ “ოცნების ქალაქის” პროექტის მეორე ეტაპის განაშენიანების დეტალური გეგმის კონცეფცია დაამტკიცა. ქალაქმშენებლობითი დოკუმენტის მიხედვით, განხორციელდება “ოცნების ქალაქის“ მშენებლობის პროექტის მეორე ეტაპი | ამის შესახებ ინფორმაციას “აჭარის ტელევიზია” ავრცელებს.
- აჭარის უმაღლეს საბჭოს ორი ახალი პეტიციით მიმართეს. მოქალაქე, ნესტან ანანიძე აჭარაში არსებული მუსლიმური საკულტო ნაგებობების აღრიცხვასა და მათი სარეაბილიტაციო სამუშაოების დაგეგმვას ითხოვს. მოქალაქე, მაია ქათამაძეს კი აქვს ინიციატივა, შშმ პირებისთვის „ადაპტირებული ტექნოლოგიების მხარდამჭერი პროგრამა“ იქნას უზრუნველყოფილი | ინფორმაციას ამის შესახებ “TV25” ავრცელებს.
- აჭარის საჯარო სკოლების ბიბლიოთეკებში არსებული მდგომარეობის გამოვლენა და მოგვარება – ამ თემაზე ბათუმის შოთა რუსთაველის სახელმწიფო უნივერსიტეტში აჭარის უმაღლესი საბჭოს განათლების, მეცნიერების, კულტურისა და სპორტის საკითხთა კომიტეტის გასვლითი სხდომა გაიმართა. კომიტეტის თავმჯდომარე დავით ბაციკაძე საკითხის თემატურ მოკვლევასთან დაკავშირებით მოხსენებით წარსდგა | ინფორმაციას ამის შესახებ გაზეთი “აჭარა” ავრცელებს.
- ბათუმის სტადიონმა უძრავი ქონების პირველ ეროვნულ დაჯილდოებაზე საუკეთესო საჯარო შენობების კატეგორიაში ოსკარი მოიპოვა. გამარჯვებულების გამოვლენა საერთაშორისოდ აღიარებული სტანდარტების შესაბამისად ჟიურის მიერ განხორციელდა | ინფორმაციას ამის შესახებ “TV25” ავრცელებს.
- ბათუმში, მუნიციპალურ ტრანსპორტში მგზავრობის საფასურის გადახდა ნებისმიერი საბანკო ბარათით იქნება შესაძლებელი. აღნიშნული ცვლილება ძალაში 2023 წლის დასაწყისში შევა | ინფორმაციას ამის შესახებ “ბათუმელები” ავრცელებს.
- აჭარის ტურიზმის დეპარტამენტი სკანდინავიის მოგზაურთა ასოციაციის “PATA” საერთაშორისო ვორქშოპში მონაწილეობდა. უწყების მენეჯმენტმა ბიზნეს შეხვედრები დანიისა და შვედეთის 200-მდე ტურისტული კომპანიისა და ტურისტული სექტორის წარმომადგენლებთან გამართა | ამის შესახებ ინფორმაციას “აჭარის ტელევიზია” ავრცელებს.
- ქედის მუნიციპალიტეტის საკრებულოს მაჟორიტარი დეპუტატი, ჯანმრთელობისა და სოციალურ საკითხთა კომისიის თავმჯდომარე ოთარ ხარაძე იმათ შორისაა, ვინც ამ დღეებში “ხალხის ძალას” თანადგომა გამოუცხადა | ინფორმაციას ამის შესახებ გაზეთი “აჭარა” ავრცელებს.
