ბათუმის მე-7 სკოლის დირექტორი სკოლაში მომხდარი ინციდენტის გამო დაკავებული თანამდებობიდან გაათავისუფლეს. ამის შესახებ აჭარის განათლების, კულტურისა და სპორტის მინისტრმა ჟურნალისტებთან განაცხადა. მაია ხაჯიშვილის განცხადებით მოკვლევის შედეგად გამოიკვეთა კანონმდებლობის დარღვევა.
„იმ გარემობის გათვალისწინებით, რაც დადგინდა მოკვლევის შედეგად, სამინისტრომ მიიღო გადაწყვეტილება და მითითებული საჯარო სკოლის დირექტორი დღესვე დატოვებს თანამდებობას.
ვინაიდან, სასწავლო რესურსის დროს გამოიკვეთა საქართველოს კანონმდებლობის დარღვევა, მათ შორის, ისეთი სტიკერების განთავსება, რომელიც მიუღებელია კანონმდებლობით და კონსტიტუციით. შესაბამისად იქნა ეს გადაწყვეტილება მიღებული.
რამდენიმე დარღვევაა კომპლექსურად, მათ შორის იმ სტიკერების გამოყენება, რომელიც ეწინააღმდეგება კანონმდებლობას. ერთ-ერთი მოსწავლე ნამდვილად არ არის გარიცხული“,- განაცხადა მაია ხაჯიშვილი.
ინფორმაციისთვის, ბათუმის მეშვიდე საჯარო სკოლაში მოსწავლემ სტენდზე სხვა ქვეყნების დროშებთან ერთად გაკრული რუსეთისა და აფხაზეთის დროშები ჩამოხია, რის გამოც მოსწავლეს საგაკვეთილო პროცესი დაატოვებინეს და ინვენტარის დაზიანებისთვის საყვედური გამოუცხადეს.
სკოლაში მომხდარ ინციდენტთან დაკავშირებით ინფორმაცია თავდაპირველად TV25-მა გაავრცელა.
