ამ წუთებში ბობოყვათში განგაშია. “აჭარა ტექსტილიდან” დასაქმებულების ევაკუაცია მიმდინარეობს. სამკერვალოში დასაქმებულები “აჭარა.News” უყვებიან, რომ საწარმოს ტერიტორიაზე ბუნებრივი აირის მილი დაზიანდა, რის გამოც გაზი ღია სივრცეში იფრქვევა.
ფაბრიკის ტერიტორიაზე მობილიზებულია, სოკარ ჯორჯია გაზი აჭარას წარმომადგენელები, პოლიცია და სასწრაფო სამიდიცინო დახმარების ჯგუფები.
როგორც “აჭარა ტექსტილის” დირექტორი დათო ჯაიანი აცხადებს, საწარმოს გაზი არ მიეწოდება, გადაკეტილია და შესაბამისად, საწარმოს ტერიტორიაზე ბუნებრივი აირის გაჟონვა ვერ მოხდებოდა.
“რამ გამოიწვია ეს, რითი მოიწამლა და აქვს თუ არა ადგილი მოწამვლას, დაადგენს სამედიცინო დაწესებულებები. მე ვფიქრობ, რომ უფრო პანიკური შიშით შეიძლება იყოს ეს ყველაფერი გამოწვეული. სოკარი გამოვიძახეთ იქედან გამომდინარე, რომ დარწმუნებულიყვნენ დასაქმებულები, რომ რეალურად გაჟონვის ფაქტს ადგილი არ აქვს. სამზარეულოში სხვა მხრიდან შედის გაზი და ფაქტობრივად, წარმოების პროცესში ეს ხელის შემშლელი გარემოება არ არის. საწარმოში არ შედის გაზი საერთოდ.
რაც შეეხება ბუნებრივი აირის სუნს ტერიტორიაზე, სოკარის წარმომადგენლებიც არიან და შეგიძლიათ კითხოთ, ტერიტორიაზე მე ყოველ შემთხვევაში, არ შემიმჩნევია.
რეალურად რამდენი პირია გადაყვანილი არ ვიცი. ვითარებას ვსწავლობთ. საწარმოში დაახლოებით 1300-მდე ადამიანია დასაქმებული. მიმდინარეობს მოკვლევა, თუ რამ გამოუწვია ეს შემთხვევა”- აცხადებს დათო ჯაიანი.
შეგახსენებთ, აჭარა ტექსტილში ანალოგიური შემთხვევა ორი დღის წინაც მოხდა.
