“ის საქართველოს მოქალაქეა, შეიძლება ითქვას, ქართველი ბიზნესმენი. ის დამნაშავედ ცნეს და მისი გასამართლება 2018 წელს დასრულდა. მაშინ, ჩვენ მოვითხოვეთ მისი ექსტრაიდრება და ახლაც ველით ამას. ამჟამად ის გასამართლებულია როგორც საქართველოს მოქალაქე, რა თქმა უნდა, საქართველოს კანონმდებლობის შესაბამისად და არა როგორც თურქეთის მოქალაქე, თუმცა ჩვენ კვლავ ვითხოვთ მის ექსტრადირებას”, – ამბობს ელჩი.
ბიზნესმენი გალიფ ოზთურქი 31 მაისს ბათუმში დააკავეს. ოზთურქს პროკურატურამ ბრალი განსაკუთრებით დიდი ოდენობით ნარკოტიკული საშუალების უკანონო შეძენის და შენახვაზე წარუდგინა.
ოზთურქი, რომელმაც საქართველოს მოქალაქეობა 2015 წელს მიიღო, ხშირად ჩნდებოდა საქართველოს პრემიერმინისტრ ირაკლი ღარიბაშვილთან, ასევე ყოფილ პრემიერებთან გიორგი გახარიასთან, გიორგი კვირიკაშვილთან და სხვა მაღალჩინოსნებთან ერთად.
2018 წელს, თურქული მედიის ცნობით, ოზთურქს თურქეთის სასამართლომ მკვლელობის წაქეზებისთვის პატიმრობა მიუსაჯა. საქართველოში ოზთურქი სწორედ პატიმრობის თავიდან ასაცილებლად გამოიქცა.
თურქი ბიზნესმენის კომპანიები ძირითადად ტურიზმის, ტრანსპორტისა და მშენებლობის ინდუსტრიებში საქმიანობს. მისი ერთ-ერთი ყველაზე დიდი აქტივია ბათუმში მდებარე სასტუმრო “ეიფორია”. 2020 წლის მონაცემებით, გალიფ ოზთურქმა საქართველოში $500 მილიონის ინვესტიცია განახორციელა.
“აჭარა.News” რამდენიმე დღის წინ ექსკლუზიურად წერდა იმის შესახებ, რომ საქართველოსა და თურქეთის ხელისფულებას შორის შეთანხმება მოხდა. გალიფ ოზთურქს, ქართველ ბიზნესმენზე, ედნარ პაპუნაიშვილზე გაცვლიან, რომელიც ერთი თვის წინ თურქეთში სპეცოპერაციის შედეგად დააკავეს. ეს უკანასკნელი ერთი კვირის წინ, იმ დროს გაათავისუფლეს, როდესაც ოზთურქი გისოსებს მიღმა აღმოჩნდა.
