ქალაქ ბათუმის მუნიციპალიტეტის ახლადარჩეული საკრებულოს სხდომა 12 აპრილს გაიმართება.
სხდომაზე დღის წესრიგით სამი საკითხი, მუნიციპალიტეტის ახლადარჩეული საკრებულოს წევრის, რამაზ ჯინჭარაძის, უფლებამოსილების ცნობა, საკრებულოს წევრის, ნინო ბაციაშვილის, უფლებამოსილების შეწყვეტის ცნობად მიღება და ქალაქ ბათუმის მუნიციპალიტეტის საკრებულოს თავმჯდომარის არჩევა, არის გათვალისწინებული.
ბათუმმა საკრებულო 2 ოქტომბერს აირჩია, თუმცა საკრებულოს სხდომები არ იმართებოდა და ვერც საკრებულოს თავმჯდომარეს ირჩევდნენ, რადგან ხმათა უმრავლესობა ( 18 ხმა) აქამდე არც მმართველ პარტიას ჰქონდა და არც ოპოზიციას.
შეგახსენებთ, 2 აპრილის შუალედურ არჩევნებში ბათუმის საკრებულოს მაჟორიტარი დეპუტატი „ქართული ოცნების“ კანდიდატი, რამაზ ჯინჭარაძე გახდა.
მისი კონკურენტი „ერთიანი ნაციონალური მოძრაობის“ კანდიდატი, მათე ფუტკარაძე იყო. მათე ფუტკარაძის მამამ, ნუგზარ ფუტკარაძემ, 2021 წლის 2 ოქტომბრის არჩევნებზე გაიმარჯვა და ბათუმის საკრებულოს წევრი გახდა, თუმცა 2021 წლის ნოემბერში გარდაიცვალა.
„ერთიანი ნაციონალური მოძრაობა“ მის გარდაცვალებაში „ქართულ ოცნებას“ ადანაშაულებს. 35 წევრისგან შემდგარ ბათუმის საკრებულოში „ქართული ოცნებას“ 16 წევრი ჰყავდა, ოპოზიციას – 17 ( „ერთიანი ნაციონალური მოძრაობის“ 14 წევრი, „გახარია – საქართველოსთვის“ – 2, „ლელო“ -1), ერთი დამოუკიდებელი დეპუტატია.
ბათუმის საკრებულოში რამაზ ჯინჭარაძის შესვლით ბალანსი იცვლება – „ოცნებაც“ და ოპოზიციაც საკრებულოში უკვე 17-17 წევრით იქნება წარმოდგენილი. რჩება 1 დამოუკიდებელი დეპუტატი, გახარიას პარტიის ყოფილი წევრი, რომლის განცხადებითაც, ენმ-თან თანამშრომლობა მისთვის მიუღებელია.
