ოპოზიციის მორიგი ბრალდება “ქართულ ოცნებას”. “ერთიანი ნაციონალური მოძრაობა” მმართველ გუნდს ბათუმში, მეოთხე სამაჟორიტარო ოლქში, ამომრჩეველთა რიცხვის ხელოვნურად გაზრდაში სდებს ბრალს. განცხადება პარტიის ლიდერმა, ბრიფინგზე გააკეთა.
გიორგი კირთაძის ინფორმაციით, ოლქში 1053 ახალი ელექტორატია რეგისტრირებული. მისივე თქმით, უმრავლესობა ამ დრომდე, სხვადასხვა რეგიონის ამომრჩეველი იყო. ხელისუფლების ოპონენტები ცენტრალურ საარჩევნო კომისიას მოუწოდებენ, შუალედური კენჭისყრა, ბათუმში, 2 ოქტომბრის სიით ჩაატარონ.
ბათუმის 79-ე საოლქო საარჩევნო კომისიის თავმჯდომარის განმარტებით, ბათუმის მეოთხე სამაჟორიტარო ოლქში, ამომრჩეველს, კანონის დადგენილ ვადებში, რეგისტრაციის ადგილის შეცვლის საშუალება ჰქონდა. ციალა შავაძის თქმით, ელექტორატთა ერთიან სიაზე პასუხისმგებელი „ცესკოა“.
ენმ-ს განცხადებას გამოეხმაურა “ქართული ოცნების” წევრი ბათუმში. ირაკლი ჭეიშვილმა ბრალდებას უსაფუძვლო უწოდა და თქვა, რომ ნაცმოძრაობა არითმეტიკაში ვერ ერკვევა.
შეგახსენებთ, 2 აპრილს ბათუმში საკრებულოს შუალედური არჩევნები გაიმართება. რეგისტრირებულია ორი კანდიდატი – “ქართული ოცნებიდან” რამაზ ჯინჭარაძე და „ნაციონალური მოძრაობიდან“ მათე ფუტკარაძე.
