ბათუმის სპორტის სასახლე მუხრან ვახტანგაძის სახელობის გახდა. ინფორმაციას აჭარის განათლების სამინისტროში ადასტურებენ.
უწყების ინფორმაციით, ინიციატივა სპორტულ საზოგადოებას ეკუთვნის, რომლებმაც მინისტრს წერილობით მიმართეს.
სპორტსკოლისათვის “მუხრან ვახტსნგაძის სახელობის ბათუმის სპორტის სასახლის” დარქმევის შესახებ ბრძანება აჭარის განათლების მინისტრმა 2021 წლის დეკემბერში გამოსცა.
“სპორტულმა საზოგადოებამ მოითხოვა. მათგან სამინისტროში ხელმოწერებით წერილი შემოვიდა, რომლითაც მოითხოვდნენ მუხრან ვახტანგაძის სახელის მინიჭებას, რათა დაფასდეს მისი ღვაწლი თაობებთან მიმართებაში, ჩამოწერილია ყველა რეგალია.
განცხადებას ხელს აწერს სხვადასხვა ფედერაციის ხელმძღვანელი და წარმომადგენელი, ასევე სპორტული ჟურნალისტები.
მართლაც დიდია მუხრან ვახტანგაძის ღვაწლი და რადგან სპორტულმა საზოგადოებამ მოითხოვა, მინისტრმა მიანიჭა სახელი სპორტული საზოგადოების მოთხოვნით”- აცხადებენ უწყებაში.
ინფორმაციისთვის, მუხრან ვახტანგაძე აჭარის მთავრობის თავმჯდომარის მოქმედი მრჩეველია. ის საქართველოს მეცხრე მოწვევის პარლამენტის წევრი იყო “ქართული ოცნებიდან”.
მუხრან ვახტანგაძე ბერძნულ-რომაული სტილით მოჭიდავეა.
ის 2000 წლის ოლიმპიური თამაშების მონაწილე და მესამე ადგილის მფლობელი, ასევე 2001 წლის მსოფლიო ჩემპიონი 85 კგ წონით კატეგორიაში და 2003 წლის ევროპის ჩემპიონატის მესამე ადგილის მფლობელია.
