“ნაციონალური მოძრაობა” ბათუმის მეოთხე საარჩევნო ოლქში შუალედურ არჩევნებზე ერთ-ერთ მაჟორიტარ კანდიდატად გარდაცვლილი დეპუტატის, ნუგზარ ფუტკარაძის შვილის, მათე ფუტკარაძის კანდიდატურას განიხილავს. გიორგი კირთაძის განცხადებით, ამ ეტაპზე საბოლოო გადაწყვეტილება არ მიუღიათ და სხვა კანდიდატებიც განიხილება.
“მარტო ჩვენი პარტიიდან არ გვინდა იყოს კანდიდატი. მალე გაიგებს საზოგადოება საბოლოო გადაწყვეტილებას. ეს იქნება ღირსების
არჩევნები და ამიტომ ღირსეული კანდიდატი გვეყოლება”, – აღნიშნა გიორგი კირთაძემ.
შეგახსენებთ, ბათუმის საკრებულოს დეპუტატი “ერთიანი ნაციონალური მოძრაობიდან” ნუგზარ ფუტკარაძე რამდენიმე თვის წინ გარდაიცვალა.
“ერთიანი ნაციონალური მოძრაობის“ მტკიცებით მმართველ პარტიასთან დაკავშირებული პირები მოსყიდვასა და მასზე ზეწოლას ახორციელებდნენ. მათივე ინფორმაციით, ნუგზარ ფუტკარაძესთან აჭარის მთავრობის თავმჯდომარის მამის, დავით რიჟვაძის, დავალებით ასლან აბაშიძისდროინდელი ძალოვანი მაღალჩინოსნები, ვაჟა თაბაგიძე და ბადრი ბაკურიძე აწარმოებდნენ მოლაპარაკებას.
ენმ-ის წევრებმა აუდიო ჩანაწერები გაასაჯაროეს, სადაც ისმის, რომ ნუგზარ ფუტკარაძეს 100 ათას დოლარს სთავაზობენ და სთხოვენ საკრებულოში „ნეიტრალური მხარი დაიჭიროს“. გიორგი კირთაძის ინფორმაციით, ჩანაწერები გარდაცვლილმა დეპუტატმა გააკეთა და მასზე ნუგზარ ფუტკარაძისა და ყოფილი მაღალჩინოსნების საუბარია ასახული.
