„მილიცია“, „არა პოლიციურ რეჟიმს“, „აქ არიან ჯალათები“ – ამ ლოზუნგებით პოლიციის ბათუმის მეექვსე განყოფილებასთან „ლელოს“ ახალგაზრდული ორგანიზაციის წევრებმა აქცია გამართეს.
როგორც აქციის მონაწილეები აცხადებენ, ამ ფორმით ეხმიანებიან აღნიშნულ განყოფილებაში რამდენიმე დღის წინ ჟურნალისტებზე განხორციელებულ ფიზიკურ ძალადობას და აცხადებენ, რომ არ სურთ ცხოვრება პოლიციურ სახელმწიფოში, სადაც პოლიცია მოქალაქეების უფლებების დაცვის ნაცვლად, ფიზიკურად ძალადობს მათზე და უკლავს მომავლის პერსპექტივას.
“აქ შევიკრიბეთ იმიტომ, რომ სწორედ პოლიციის ეს განყოფილება გამოირჩევა მოქალაქეებზე სასტიკი და ხშირი ძალადობით, მსგავსი ფაქტი სამი დღის წინაც დაფიქსირდა, როცა ახალგაზრდა ჟურნალისტებზე იძალადეს.
ამ ფაქტებზე თვალის დახუჭვა მორალური დანაშაული იქნება. ძალადობრივი, პოლიციური სისტემა ძირს უთხრის დემოკრატიულ ღირებულებებს.
ისევ 30 წლიან წრეზე მივდივართ, რასაც ვაპროტესტებდით წინა ხელისუფლების დროს , იგივე უფრო მძიმე ფორმატით მეორდება”- განაცხადა “ლელოს” ბათუმის ახალგაზრდული ორგანიზაციის ხელმძღვანელმა ალექსანდრე ფიფიამ.
ინფორმაციისთვის, ჟურნალისტი გიორგი არობელიძე ბათუმის მეექვსე განყოფილების პოლიციელებს ფიზიკურ ძალადობაში ადანაშაულებს.
ჟურნალისტის განცხადებით, ის ბათუმში მდებარე ერთ-ერთ ბართან ინციდენტის თვითმხილველი გახდა, ადგილზე მისულმა პილიციელებმა კი გიორგი არობელიძე და ჟურნალისტი რატი რატიანი დააკავეს და ფუზიკური შეურაცხყოფა მიაყენეს.
ადმინისტრაციული წესით დაკავებულები 18 დეკემბერს ბათუმის საქალაქო სასამართლომ გაათავისუფლა.
საქმის განხილვა კი პარასკევს, 24 დეკემბერს არის დანიშნული. ადმინისტრაციულ პასუხისგებაში მიცემული ჟურნალისტების ინტერესებს სასამართლოში „სოციალური სამართლიანობის ცენტრი“ დაიცავს.
ჟურნალისტებმა სამართალდამცავების მხრიდან, შესაძლო, დანაშაულის ფაქტზე სახელმწიფო ინსპექტორის სამსახურს უკვე მიმართეს.
