“ერთიანი ნაციონალური მოძრაობის” წევრები ახალ ბულვარში განხორციელებულ ნაპირსამაგრ სამუშაოებთან დაკავშირებით არჩილ ჩიქოვანისგან განმარტებას ითხოვენ. როგორც ოპოზიციაში აცხადებენ, პოლიციის კორდონის გამო მერთან შეხვედრას ვერ ახერხებენ, ამიტომ წერილობით მიმართავენ მერს.
როგორც დღეს ბათუმის მერიაში გამართულ ბრიფინგზე ოპოზიციის წარმომადგენლებმა განაცხადეს, ბათუმის ახალ ბულვარში ნაპირსამაგრი სამუშაოები უხარისხოდ შესრულდა, პროექტის ღირებულება 56 მილიონი ლარია.
მათივე ინფორმაციით, ნაპირსამაგრი სამუშაოები 2 წლის დაგვიანებით დასრულდა, არასწორად შედგენილი პროექტის გამო კი ნაპირსამაგრი ნაგებობა მოშლილია, სანაპირო ზოლი კი პრაქტიკულად დაკარგული.
“2017 წლიდან საქართველოს მუნიციპალურმა ფონდმა განახორციელა ნაპირსამაგრი სამუშაოები, რომელიც უნდა დამთავრებულიყო 2019 წელს, მაგრამ დროში გაიწელა და დასრულდა 2021 წელს. მისი ღირებულება გახლდათ 56 მილიონი ლარი. მიუხედავად ამისა, ჩვენ ვხედავთ დღეს თუ რა მდგომარეობაა ბათუმში. ნაპირსამაგრი ნაგებობა არის სრულიად მონგრეული და ნაპირსამაგრ ზოლზე სრულიად დაკარგულია პლაჟი. ვხვდებით, რისი ბრალია ეს – არასწორად შედგენილი პროექტი, შერჩეული კომპანია და ასე შემდეგ.
ჩვენი ინფორმაციით, დღეს, ინფრასტრუქტურის სამინისტრო და მუნიციპალური განვითარების ფონდი აპირებს, რომ ეს ნაპირსამაგრი ნაგებობა გადასცეს ბათუმის მერიას. ამიტომ, ჩვენ დღეს მოვედით აქ. ბათუმის მერი არ გვიშვებს კაბინეტში, ბარიკადები მოგვიწყო აქ და ვითხოვთ წერილობით განმარტებას – რას ფიქრობს თვითმარქვია მერი ამ კორუფციული გზით დახარჯულ 56 მილიონ ლარზე. არასწორად შესრულებული სამუშაოების ფონზე, დღეს ვხედავთ, თუ რა მდგომარეობაა ბათუმში. მდგომარეობა ბათუმელებისთვის არის საგანგაშო და საფრთხის შემცველი”, – ბათუმის საკრებულოს დეპუტატმა “ერთიანი ნაციონალური მოძრაობიდან” ბაჩი მექვაბიშვილმა.
