„კოვიდ-19“-ით ინფიცირების მზარდი მაჩვენებლის გამო, ირლანდია ახალ შეზღუდვებს აწესებს
„კოვიდ-19“-ით ინფიცირების მაღალი მაჩვენებლის გამო, ირლანდიაში ახალი შეზღუდვები დაწესდა. ქვეყნის ჰოსპიტალური სექტორი უკიდურესად მძიმე პირობებში მუშაობს, რის გამოც მთავრობამ ქმედითი ნაბიჯების გადადგმა გადაწყვიტა.
ახალი გადაწყვეტილების თანახმად, მოქალაქეებზე დისტანციურად მუშაობის რეკომენდაცია გაიცა, თუ მათი ყოფნა სამუშაო ადგილზე „გადაუდებელ აუცილებლობას“ არ წარმოადგენს.
კვების ობიექტებზე, ასევე კინოთეატრებში, მუზეუმებსა და სხვა საზოგადოებრივი თავშეყრის ადგილებში ყოფნას კი მხოლოდ „მწვანე ბარათის“ მფლობელები შეძლებენ. ე.წ. მწვანე ბარათი გაიცემა ყველა იმ მოქალაქეზე, რომლებიც „კოვიდ-19“-ის საწინააღმდეგო ვაქცინით ორჯერ აიცრნენ ან ახლახან გამოჯანმრთელდნენ.
ირლანდიის პრემიერმინისტრის, მაიკლ მარტინის განცხადებით, რომ არა ვაქცინაციის ფართომასშტაბიანი კამპანიის შედეგად მიღწეული პროგრესი, მთავრობას სრული „ლოკდაუნის“ გამოცხადება მოუწევდა.
შეგახსენებთ, რომ ირლანდიაში 12 წელს ზემოთ მოსახლეობის თითქმის 90 პროცენტი სრულად ვაქცინირებულია.
