“ნუგზარ ფუტკარაძე მოკლეს მამა-შვილმა რიჟვაძეებმა, ბიძინას, ღარიბაშვილისა და კობახიძის დავალებით“, – განაცხადა აჭარის მთავრობის სახლთან დღეს გამართულ აქციაზე უმაღლესი საბჭოს დეპუტატმა “ერთიანი ნაციონალური მოძრაობიდან” ელგუჯა ბაგრატიონმა.
“ქართული ოცნება კლავს!”, “შსს გამოფხიზლდი!”, “გადადგეს მამა -შვილი რიჟვაძეები”- ამ მოთხოვნებით აჭარის მთავრობის სახლთან ამ წუთებში საკრებულოს ოპოზიციონერი წევრების აქცია მიმდინარეობს.
აქციის წევრების განცხადებით, “ქართული ოცნების” მხრიდან შანტაჟისა და მოსყიდვის მცდელობამ იმსხვერპლა ბათუმის საკრებულოს წევრი ნუგზარ ფუტკარაძე.
შეგახსენებთ, ნუგზარ ფუტკარაძე 18 ნოემბერს გარდაიცვალა. გუშინ ენმ-ის წევრებმა აუდიო ჩანაწერი გაავრცელეს, რომელზეც, ოპოზიციის განცხადებით, ნუგზარ ფუტკარაძეს დავით რიჟვაძის დავალებით ასლან აბაშიძის დროინდელი მაღალჩინოსნები “ნაციონალური მოძრაობის” დატოვებისა და დამოუკიდებელი დეპუტატის სტატუსით საქმიანობის გაგრძელების სანაცვლოდ 100 ათას დოლარს სთავაზობდნენ.
