ბათუმის საკრებულოს ახალარჩეული ოპოზიციონერი დეპუტატების განცხადებით, 25 ნოემბერს საკრებულოს ძველი შემადგენლობა მომავალი წლის ბიუჯეტის დასამტკიცებლად შეიკრიბება, რასაც ხელს შეუშლიან და სხდომის ჩაშლას შეეცდებიან.
როგორც დღეს გამართულ ბრიფინგზე ოპოზიციონერმა დეპუტატებმა განაცხადეს, სხდომაზე დასწრების უფლება აქვთ და ფიზიკურად შეეცდებიან სხდომის ჩაშლას, გამოიყენებენ ყველა ბერკეტს, რათა არალეგიტიმურმა საკრებულომ ვერ შეძლოს ბიუჯეტის დამტკიცება.
მათივე განცხადებით, “ქართულ იცნებას” გადაწყვეტილი აქვს ოპოზიციური საკრებულოს დაშლა.
„ბათუმის მერი, რომელიც რა გზით არის არჩეული, ყველამ იცის, უკვე შეუდგა მოვალეობის შესრულებას, მაშინ, როცა „ქართული ოცნება“ შეგნებულად არ ნიშნავს ახალი საკრებულოს სხდომას. ცდილობენ საკრებულოს ძველმა შემადგენლობამ დაამტკიცოს ბიუჯეტი, რითაც მერს აღარ შეექმნება პრობლემა, არ დადგება მისი პასუხისმგებლობის საკითხი, ამიტომ მერი დარჩება ადგილზე და „ქართული ოცნება“ დაშლის ახალ საკრებულოს, შემდეგ კი, დანიშნავს მხოლოდ საკრებულოს და არა მერის არჩევნებს, რასაც არ დავუშვებთ“, – ამბობს გიორგი კირთაძე.
გიორგი გახარიას პარტია „საქართველოსთვის“ საკრებულოს არჩეული წევრები საერთო განცხადების გაკეთებისას ოპოზიციის წევრებს არ შეუერთდნენ.
