მესამე პრეზიდენტის მულტიფუნქციურ კლინიკაში გადაყვანის მოთხოვნით ბათუმის სახელმწიფო უნივერსიტეტის ლექტორ-მასწავლებელთა ნაწილი მიმართვას ავრცელებს.
“ჩვენ, ბსუ-ს პროფესორ-მასწავლებლებს, რომლებიც ვემსახურებით მეცნიერებასა და მომავალი თაობების განათლებას, მიუხედავად ჩვენი პოლიტიკური შეხედულებისა, პრინციპულად მნიშვნელოვნად მიგვაჩნია სამოქალაქო პოზიციის გამოხატვა ქვეყანაში მიმდინარე მეტად კრიტიკული სიტუაციის გამო. ვიმედოვნებდით, რომ სიტუაცია განიმუხტებოდა, მაგრამ საპირისპიროს მოწმენი გავხვდით. ამიტომ მოვითხოვთ ქვეყნის მესამე პრეზიდენტის სიცოცხლის უფლების დაცვას და მის გადაყვანას შესაბამის სამკურნალო დაწესებულებაში. მიგვაჩნია, რომ ეს არის არა მარტო მესამე პრეზიდენტის სიცოცხლის, არამედ სამოქალაქო შუღლის თავიდან აცილებისა და ჩვენი ქვეყნის მსოფლიო ცივილიზებულ საზოგადოებაში ყოფნა-არყოფნის საკითხი. გთხოვთ, აღნიშნული ნაბიჯი დაუყოვნებლივ გადაიდგას, რათა არ მივიღოთ ფატალური შედეგი”- ნათქვამია მიმართვას.
პეტიციაზე ხელის მოწერა შეუძლიათ როგორც უნივერსიტეტში დასაქმებულ პირებს, ასევე სტუდენტებს ელექტრონულად და ბეჭდური სახით.
