თურქეთში მომხდარი ავტოსაგზაო შემთხვევის შედეგად ახალგაზრდა გარდაიცვალა.
თურქული მედიის ინფორმაციით, მოტოციკლეტი, რომელსაც გარდაცვლილი 27 წლის ნინო ჩქარეული (ჯერუუ) მართავდა, ქვეითს დაეჯახა. შეჯახების შედეგად ახალგაზრდა ქალი გადმოვარდა და სიცოცხლისთვის შეუთავსებელი ტრავმები მიიღო. დაშავებული საავადმყოფოში გადაიყვანეს, თუმცა ექიმების მცდელობის მიუხედავად მისი გადარჩენა ვერ მოხერხდა.
ნინო წარმოშობით თბილისელია და ბოდრუმში დედასთან ერთად იმყოფებოდა. გარდაცვლილი გოგონას დედა ლალი ჩქარეული წლების განმავლობაში თურქეთში ცხოვრობს. ის ბოდრუმში უძრავი ქონების ბროკერია.
ნინო ჩქარეული (ჯერუუ) ტატუს სპეციალისტი იყო.
გარდაცვლილი ახალგაზრდა გოგონას ცხედარს სამშობლოში უახლოეს დღეებში გადმოასვენებენ.
“ჩემი მეგობრის შვილია ნინო. მისგან სამახსოვროდ ტატუ დამრჩა, მისი ხელით გაკეთებული. კეფაზე გვირგვინი დამახატა, რომ არასდროს დამავიწყდეს. ჩემს მსგავსად რამდენ ადამიანს დაუტოვა სამახსოვრო და სამუდამო ტკივილი დაგვიტოვა. ძალიან მიჭირს ამ თემაზე საუბარი”- აცხადებს ოჯახის ახლობელი“აჭარაNews”– თან საუბრისას.
