ამ წუთებში ჭყონდიდის ეპარქიაში ხმაური და დაძაბული ვითარებაა, ადგილი აქვს ფიზიკურ დაპირისპირებასაც. სალხინოს მონასტრიდან განკვეთილი 4 სასულიერო პირი, ეპარქიიდან ძალის გამოყენებით გაიყვანეს და მარტვილის პოლიციის სამმართველოში გადაიყვანეს.
ადგილზე მობილიზებულია სამართალდამცველები. მონასტერთან დარჩენილი სასულიერო პირები ამბობენ, რომ მონასტრის მიმდებარე ტერიტორიას არ დატოვებენ.
„აქედან დაიწყება სულ სხვა მოქმედებები. რას ვგულისხმობ და აქედან ჩვენ ცოცხლებს ვერ გაგვიყვანენ, მთელ საქართველოს მოვუხმობ, ვისაც სინდისი და ქართველობა აქვს, ვინც დაფიქრებულხართ, რას შვება ეს მატყუარა ხალხი,“ – განაცხადა ჟურნალისტებთან ჭყონდიდის ეპარქიიდან განკვეთილმა მამა ათინოგენემ.
ჭყონდიდის ეპარქიიდან განკვეთილ სასულიერო პირებს მონასტერში ყოფნის ვადა გუშინ ამოეწურათ. ჭყონდიდის მიტროპოლიტმა მეუფე სტეფანემ 15-მდე სასულიერო პირს მღვდელმსახურება რამდენიმე თვის წინ აუკრძალა და მონასტრიდან განკვეთა.
