ეკლესია არ ეწინააღმდეგება ვაქცინაციას, თუმცა, რადგან კომპეტენციის მიღმაა, აქტიურად ვერ ჩაერთვება ამ პროცესებში, – ამის შესახებ საქართველოს საპატრიარქოს პროტოპრესვიტერმა, გიორგი ზვიადაძემ განაცხადა.
„ეკლესიის დამოკიდებულება მკაფიოდ გამოვლინდა წმინდა სინოდის სხდომის ოქმის სახით. წმინდა სინოდი, რომელსაც ყოველთვის თავმჯდომარეობს სრულიად საქართველოს კათოლიკოს პატრიარქი ილია მეორე, მიიღო გადაწყვეტილება ამ საკითხთან დაკავშირებით, გამოხატა უდიდესი პატივისცემა ჩვენი ექიმების, სამედიცინო საზოგადოების მიმართ, იმ ადამიანების მიმართ, რომლებიც დღე და ღამე ყველაფერს აკეთებენ, რათა დაეხმარონ ადამიანებს“, – აღნიშნა საპატრიარქოს პროტოპრესვიტერმა.
მისი თქმით, მსოფლიო ჯანდაცვის ორგანიზაციის განცხადებაში არის ნათქვამი, რომ იძულებითი ვაქცინაცია არ შეიძლება. ეს არის ეკლესიის კომპეტენციის მიღმა. მოსახლეობაში უნდა გაიზარდოს ცნობიერება, რამდენად სასარგებლოა ვაქცინაცია, პასუხისმგებლობა მთლიანად არის სამედიცინო პერსონალზე, რომ მოსახლეობას ნათლად აუხსნან ვაქცინაციის სარგებლიანობა.
„არც ერთ სასულიერო პირს არ აქვს უფლება იქადაგოს ასწავლოს განსხვავებულად იმ დადგენილებისა, რომელიც წმინდა სინოდმა მიიღო. სასულიერო პირმა სწორად უნდა გადასცეს საზოგადოებას წმინდა სინოდის დამოკიდებულება და არა ის, რომ საკუთარ თავს უფლება მისცეს, განსხვავებული დამოკიდებულება წარმოაჩინოს მრევლთან, ცალკეულ ადამიანებთან“, – განაცხადა გიორგი ზვიადაძემ.
მან ასევე აღნიშნა, რომ თუ ცალკეული სასულიერო პირი განსხვავებულად საუბრობს, კრძალავს ვაქცინაციას ან ამბობს, რომ ეს ცოდვაა, ეს არის არასწორი საქციელი და ამის შესახებ უნდა ეცნობოს ეპარქიის ეპისკოპოსს, რომ დაუყოვნებლივ იქნეს გადაწყვეტილება მიღებული ამა თუ იმ სასულიერო პირის გაფრთხილებისკენ და საჭიროების შემთხვევაში დასჯასთან დაკავშირებითაც“.
