“ჩვენ ჩვენს მხარდამჭერებსა და გუნდის წევრებს არანაირი მატერიალური ფასეულობებით არ ვიჭერთ, ჩვენი პარტია გაერთიანებულია ღირებულებების გარშემო”- ასე გამოეხმაურა პარტია “გახარია საქართველოსთვის” ერთ-ერთი ლიდერი აკაკი გვიანიძე პარტიის ბათუმის ორგანიზაციის თავმჯდომარის, ირაკლი თავდგირიძის მიერ სოციალურ ქსელში გავრცელებულ განცხადებას პარტიის დატოვების შესახებ.
როგორც დღეს გამართულ ბრიფინგზე აკაკი გვიანიძემ განაცხადა, ირაკლი თავდგირიძე მოისყიდეს.
“ამიტომ, გასაყიდი უნდა გაიყიდოს და რაც მალე გაიწმინდება ჩვენი გუნდი ადამიანებისგან, ვისთვისაც ღირსებაზე მაღლა მატერიალური კეთილდღეობა დადგება, მით უკეთესი. ჩვენ ჩვენს პოზიციებს არ ვიცვლით და ვაგრძელებთ ბრძოლას ცვლილებებისთვის ბათუმისთვის და ბათუმელებისთვის. და რაც მთავარია, არც ოცნებასთან და არც ნაციონალურ მოძრაობასთან ერთად, რადგან ორივე ეს პარტია ცუდია! ორივე სწორედ ამ მეთოდებით ცდილობს შეიმარჩუნოს ან მოიპოვოს სრული ძალაუფლება, თუმცა ორივემ უნდა გაიგოს, რომ ხალხმა ჩვენი სახით, მათ ერთპიროვნულ მართვას უარი უთხრა!”- განაცხადა აკაკი გვიანიძემ.
შეგახსენებთ, გიორგი გახარიას პარტიის ბათუმის ორგანიზაციის თავმჯდომარემ პარტია „საქართველოსთვის“ დატოვა. ირაკლი თავდგირიძე ბათუმის საკრებულოში დამოუკიდებელი დეპუტატის სტატუსით იმუშავებს.
