ბათუმში მდებარე სასტუმრო “ინტურისტი” ,”ეიფორია”, “ლეგენდა”, “სქაითაუერი” და ასობით დიდი და მცირე ზომის სასტუმრო სხვა ფუნქციის მატარებელ დაწესებულებად გადაიქცა, ამის შესახებ ნაციონალური მოძრაობის მერობის კანდიდატმა ბრიფინგზე ისაუბრა. გიორგი კირთაძის თქმით, სასტუმროებში ახლა ჩინელი მიგრანტები ცხოვრობენ.
პარტიის ინფორმაციით, აჭარაში შემოსულია მსხვილი ჩინური კომპანია, რომელიც თურქული კომპანიის პარტნიორია და გაურკვეველი ტიპის საქმიანობას ეწევა. მათივე განცხადებით, აქვთ ინფორმაცია, რომ წლის ბოლომდე დაახლოებით 25 ათასი ჩინელი მიგრანტი უნდა შემოვიდეს ბათუმში.
“მათი ნაწილი უკვე შემოსულია და საცხოვრებელ სახლებად გადაკეთებულ სასტუმროებში ცხოვრობენ. ბათუმში უნდა მოეწყოს არალეგალური ჩინური ონლაინკაზინოების აიტიმართვის ცენტრი, პარალელურად კი კრიპტოვალუტის წარმოების ნაწილის გადმოტანაც იგეგმება ჩინეთიდან,”- აცხადებენ ნაციონალურ მოძრაბაში.
ოპოზიცია მოუწოდებს უსაფრთხოების სამსახურს, დროულად დაინტერესდნენ აღნიშნული ფაქტით და არ დაუშვან სახელმწიფო უსაფრთხოების საფრთხის ქვეშ დაყენება.
