აჭარის მთავრობასა და კომპანია „ამბასადორს“ შორის ურთიერთთანამშრომლობის მემორანდუმი გაფორმდა, რომლის თანახმად, ბათუმში უმსხვილესი საინვესტიციო პროექტის, „ამბასადორ აილენდის“ განხორციელება იწყება.
პროექტი თანამედროვე გასართობ-გამაჯანსაღებელი ტიპის ორი ხელოვნური ნახევარკუნძულის, ასევე ერთი კუნძულის შექმნასა და მათზე ინფრასტრუქტურის მოწყობას ითვალისწინებს.
აჭარის მთავრობის ინფორმაციით, პროექტის ფარგლებში აშენდება ახალი თანამედროვე სტანდარტების, კომერციული, გასართობი, სპორტული, საგანმანათლებლო, გამაჯანსაღებელ-სამკურნალო, საცხოვრებელი და ტურისტულ-რეკრეაციული ინფრასტრუქტურა.
მემორანდუმის თანახმად კომპანიას გადაეცემა 90 ჰა ტერიტორია ბათუმში, ბარცხანასა და თამარის დასახლებაში. მათივე ცნობით, განხორციელდება დეტალური ტექნიკურ-ეკონომიკური კვლევა, რომელშიც ჩაერთვებიან საერთაშორისო ექსპერტები და შესაბამისი კვალიფიკაციის ინსტიტუციები. ამასთან, პროექტის პირველი ფაზის განსახორციელებლად 100 მილიონი დოლარის ინვესტიციას კომპანია „ამბასადორი“ განახორციელებს, სადაც 2 000 ადამიანი დასაქმდება.
