“პარტია საქართველოსთვის” ბათუმის მერობის კანდიდატი ხელისუფლებას ზეწოლაში ადანაშაულებს.
“ეს არის ორგანიზაციული დავალება, მათი პარტიული ბოსები მაქსიმალურ ზეწოლას ახორციელებენ. ძირითადად ეს ის ადამიანებია, რომლებიც 2012 წელს “ნაციონალური მოძრაობის” ზონდერები იყვნენ,”- აცხადებს ირაკლი მიქელაძე.
მისივე ინფორმაციით, ხულოს მაჟორიტარი დეპუტატობის კანდიდატმა საკრებულოში ხელისუფლების წარმომადგენლების მხრიდან განხორციელებული ზეწოლის გამო კანდიდატურა მოხსნა. ირაკლი მიქელაძე არ გამორიცხავს, რომ ასეთი ზეწოლისა და დაშინების გამო შესაძლია პარტია სხვა პირებმაც დატოვონ.
მიქელაძის ბრალდებებს ”ქართულ ოცნებაში” პასუხობენ. ტიტე აროშიძის თქმით, გიორგი გახარაის გუნდს ადამიანები საკუთარი სურვილით ტოვებენ და შანტაჟს ადგილი არ ქონია.
”არანაირი მოსყიდვის საფუძველი და მცდელობაც კი არ ყოფილა ”ქართული ოცნების” მხრიდან. ეს ადამიანები საკუთარი ნებით და სურვილით ტოვებენ პარტიას. რა თქმა უნდა ყველა გონიერმა ადამიანმა უნდა დატოვოს, რადგან ყველა ხედავს რომ გახარია ”ნაციონალური მოძრაობის” თამაშს თამაშობს,”- განაცხადა ტიტე აროშიძემ.
